पूर्वप्रधानमन्त्री केपी शर्मा ओली त्रिवि शिक्षण अस्पतालमा भर्ना भएका छन्। शनिबार बिहान प्रहरीले पक्राउ गरेर उनलाई स्वास्थ्य परीक्षणका लागि त्यहाँ लगेको थियो। स्वास्थ्य परीक्षणपछि उनलाई प्रहरीको २ नं गणमा राख्ने तयारी थियो।

तर ‘मल्टिपल हेल्थ इस्यू’का कारण उनलाई भर्ना गरिएको अस्पतालले जनाएको छ। उनलाई अस्पतालको ५०१ नं बेडमा राखिएको छ। यो भनेको मिर्गौला प्रत्यारोपणपछि बिरामीलाई आराम गराउने बेड हो। उनि मिर्गौला पीडित पनि हुन्।

भदौ २३ र २४ को जेनजी विद्रोहमा दमन र नरसंहार गरेको भन्दै उक्त आन्दोलन जाँचबुझ समितिले कारबाहीको सिफारिस गरेपछि शनिबार बिहान ओली र तत्कालीन गृहमन्त्री रमेश लेखक पक्राउ परेका थिए।

शुक्रबार गठन भएको बालेन साह नेतृत्वको सरकारका गृहमन्त्री सुदन गुरुङले कार्यभार सम्हालेलगत्तै ओली र लेखकलाई पक्राउ गर्न आदेश दिएका थिए। शुक्रबार राति नै प्रहरी ओली र लेखक निवासमा तैनाथ थिए। तर उनिहरूलाई बिहानमात्रै नियन्त्रणमा लिइएको हो।

शुक्रबार रातिदेखि नै गुण्डुस्थित ‌ओलीको निवास घेरेर बसेको प्रहरीले शनिबार बिहानपख उनलाई पक्राउपूर्जी दिएर नियन्त्रणमा लिएको हो। त्यस्तै लेखकलाई उनको निवास कटुन्जेबाट पक्राउ गरेको थियो।

शुक्रबार गठन भएको नयाँ सरकारले गैरीबहादुर कार्की आयोगको प्रतिवेदन कार्यान्वयन गर्ने निर्णय गरेको थियो र तत्कालै गृहमन्त्री सुदन गुरुङले ओली र लेखकलाई नियन्त्रणमा लिन आदेश दिएका थिए।  

प्रहरीले ओली र लेखकलाई अस्पताल लगेर स्वास्थय परीक्षण गरिसकेको छ। उनिहरूलाई भद्रकाली प्रहरी कार्यालयको हिरासतमा राखिने बताइएको छ। र आइतबार अदालतमा उपस्थिति गराइने प्रहरीले जनाएको छ।

जेनजी प्रदर्शनबारे जाँचबुझ गर्न गठित आयोगले तत्कालीन प्रधानमन्त्री ओली र गृहमन्त्री लेखकमाथि फौजदारी मुद्दामा अनुसन्धान गर्न सरकारलाई सिफारिस गरेको थियो। भदौ २३ र २४ मा भएको जेनजी प्रदर्शनमा काठमाडौँको बानेश्वरमा गोली प्रहार गरेको घटनामा आयोगले उनीहरूलाई जिम्मेवार ठहर्‍याएको छ।

उक्त आन्दोलनका क्रममा ७६ जनाको निधन भएको थियो।