सर्वोच्च अदालतले रवि लामिछानेको मुद्धामा महान्यायाधिवक्ताको संशोधित निर्णय पेश गर्न आदेश दिएको छ।

न्यायाधीशहरू सारंगा सुवेदी र सुनिलकुमार पोखरलेको इजलासले महान्यायाधीवक्ताको गत २ माघको निर्णय पनि पेश गर्न आदेश दिएको हो।

गत ३० पुसमा महान्यायाधिवक्ता सबिता भण्डारी बरालले रवि लामिछानेको हकमा मात्रै आरोपपत्र संशोधन हुने निर्णय गरेकी थिइन्। तर, दुई दिनपछि २ माघमा भने लामिछानेसहित अरु सबै आरोपितहरूको हकमा आरोपपत्र संशोधन हुने निर्णय गरेकी थिइन्।

सर्वोच्चमा रविको हकमा गरिएको ३० पुसको मात्रै निर्णय पेश भएको भेटिएपछि इजलासले २ माघमा भएको निर्णय पनि झिकाएर पेश गर्न आदेश दिएको हो।

त्यस्तै इजलासले यो मुद्धामा हेर्न नमिल्ने न्यायाधीशबाहेक अरु न्यायाधीशको इजलासमा मुद्धा पेश गर्नु भनी आदेश गरेको छ।

आजै फैसला आउने अपेक्षा गरिए पनि इजलासको नयाँ आदेशसँगै रविसम्बन्धी मुद्धाको सुनुवाइ लम्बिने भएको छ।