रास्वपाले देशभर रास्वपाले प्रत्यक्षतर्फ उत्साहजनक अग्रता पाइरहँदा प्रतिनिधिहरूलाई समानुपातिकको गणनामा पनि विशेष ध्यान दिन आग्रह गरेको छ।

यता उत्सव मनाइरहँदा उता समानुपातिक मतगणनामा कमजोरी हुनसक्ने भन्दै रास्वपा सहमहामन्त्री विपिन आचार्यले यस्तो आग्रह गरेका हुन्।

रास्वपा सहमहामन्त्रीको आग्रह–

‘यो उल्लास, परिवर्तनप्रतिको यो भरोसा र तपाईंहरूले दिनुभएको मायाप्रति हामी नतमस्तक छौँ। प्रत्यक्षतर्फको नतिजाले हामीलाई उत्साहित बनाएको छ, तर हाम्रो जिम्मेवारी अझै बाँकी छ।आदरणीय उम्मेदवार तथा सुभेच्छुक साथीहरूमा विनम्र अनुरोध;समानुपातिक मतको गणनामा चनाखो बनौँ।
प्रत्यक्षतर्फको जितको खुसीयालीमा  उत्सव मनाइरहँदा, समानुपातिकतर्फको मतगणना स्थलमा हाम्रो उपस्थितिलाई कमजोर हुन नदिऊँ। पार्टीको समग्र शक्ति र सदनमा हाम्रो बलियो उपस्थितिको लागि समानुपातिकको एक-एक मत निर्णायक हुन्छ। त्यसैले गणना नसकिउन्जेल विशेष ध्यान दिनुहोला। हाम्रो सानो असावधानीले जनताले दिएको अमूल्य मत खेर जान सक्छ। संयमित भएर अन्तिम मत परिणामसम्म पहरेदारी गरौँ। परिवर्तनको घण्टी बजिसकेको छ, अब यसलाई सुदृढ बनाउने पालो हाम्रो हो।  मतको रक्षालाई पहिलो प्राथमिकतामा राखौँ।’