विवादास्पद मेडिकल व्यवसायी तथा राजावादी अभियन्ता दुर्गा प्रसाईंलाई ५ दिन हिरासतमा राखेर अनुसन्धान गर्न प्रशासनले अनुमति दिएको छ।

राष्ट्र, राष्ट्रियता, धर्म संस्कृति तथा नागरिक बचाउ महाअभियानका संयोजकसमेत रहेका प्रसाईंलाई जिल्ला प्रशासन कार्यालय भक्तपुरले हिरासतमा राख्न अनुमति दिएको हो।

प्रहरी स्रोतका अनुसार अनुसन्धान सकिएको अवस्थामा उनीविरुद्ध मुद्धा दर्ताका लागि सिफारिस गर्ने वा फागुन २१ गते निर्वाचन सकिएको साँझ रिहा गरिने टुंगो लाग्ने छ। अनुसन्धान नसकिए उनीविरुद्ध फेरि म्याद थप हुनसक्ने  प्रहरीको भनाइ छ।

आइतबार मात्रै भक्तपुरस्थित आफ्नै निवासबाट पक्राउ परेका उनीविरुद्ध सार्वजनिक शान्तिविरुद्धको कसुरमा अनुसन्धान अघि बढाइएको छ।

निर्वाचन विरोधी गतिविधि गरेको आरोपमा उनी पटकपटक पक्राउ पर्दै र छुट्दै आएका छन्।