अनेरास्ववियु(क्रान्तिकारी) का केन्द्रीय संयाेजक नवराज भट्टले नवऔपनिवेशिक पुँजीवादी संसदीय व्यवस्थाविरुद्ध विद्रोह गर्नु युगीन कार्यभार भएकाे बताएका छन्।

मंगलबार विद्यार्थी दिवसका सन्दर्भमा शुभकामना वक्तव्य जारी गर्दै उनले भने, ‘नवऔपनिवेशिक पुँजीवादी संसदीय व्यवस्था र त्यसद्वारा निर्देशित एवम् सञ्चालित शिक्षा प्रणालीका विरुद्ध विद्रोह गर्नु युवा विद्यार्थीको नयाँ युगीन कार्यभार हो। किनभने त्यसले युवा विद्यार्थी, पूँजी र प्रतिभाको पलायन मात्र होइन, अपमानित सस्तो श्रमिकको रूपमा विदेश बेचिरहेको छ।’

संयाेजक नवराज भट्टले युवा विद्यार्थीको सुन्दर जीवन र भविष्यको ग्यारेन्टी वैज्ञानिक समाजवाद मात्र सम्भव भएकाे दाबी गर्दै उनले त्यसका खातिर वैज्ञानिक समाजवादी जनक्रान्तिको समर्थन, सहयोग र सहभागिता जरुरी रहेकाे बताए।

उनले नेपाली विद्यार्थी आन्दोलन बलशाली रहेको र विद्यार्थी आन्दोलन सङ्घर्ष, बलिदान र विजयको पर्याय भएकाे बताए।