राष्ट्रिय स्वतन्त्र पार्टी(रास्वपा)का सभापति रवि लामिछानेले मान्छेहरूले ‘धेरै नबोल्न’ भने पनि आफू रवि लामिछाने भएकोले अलिअलि घोच्नैपर्ने बताएका छन्।

शुक्रबार चितवनमा आयोजित चुनावी सभालाई सम्बोधन गर्दै लामिछानेले यस्तो बताएका हुन्।

‘मलाई धेरै नबोल, तिखो नबोल पनि भन्छन् । चर्को नबोल भन्छन्, मलाई गालीगलौज नगर पनि भन्छन्,’ लामिछानेले भने, ‘म परे रवि लामिछाने, अलिअलि नघोची हुँदैन।’

आफूलाई टुच्च टुच्च नघोचे आफू पनि चुप लाग्ने उनले बताए। ‘ठाउँ ठाउँबाट घोचिरहन्छन्, अनि दिइरहनुपर्छ,’ उनले भने।

आफूमाथि प्रमाण छ भनिएको ६५८ दिन भएपनि प्रमाण देखाउन नसकेको बताए।

‘चाहिएन प्रमाण भइगो। मलाई अन्तिम इच्छा सोधिएको पनि थियो। मेरो अन्तिम इच्छा सोध्दै बुट बजारेर सोधिएको पनि तपाईंहरूलाई थाहै होला। मैले त्यसको जवाफ दिएको थिएन,’ उनले भने, ‘आज म चितवनबाट भन्न चाहन्छु– मेरो अन्तिम इच्छा के हो २१ गते मत पत्रमा देखाइदिनुहोला।’