नेकपा एमालेका अध्यक्ष केपी ओलीले देशमा भोकमरीको अन्त्य गरिसकेको दाबी गरेका छन्।

झापा–५ स्थित पर्ने दमकमा तीन पाङ्ग्रे सवारी चालकहरूसँगको छलफलमा ओलीले भोकमरी अन्त्य भइसकेको दाबी गर्दै अब आफ्नो पार्टीको ध्यान सुकुम्वासी र गरिबहरूको पक्षमा रहेको बताएका हुन्।

उनले आफू ‘कोही भोकै हुनुहुँदैन, कोही पनि भोकै मर्दैन’ भन्ने नीतिका साथ अगाडि बढेको बताए।

उनले भने, ‘सुकुम्वासी, गरिबहरूका सम्बन्धमा हाम्रो पार्टीले सबैभन्दा बढी ध्यान दिन्छ। हाम्रो नीति, कोही पनि भोकै हुनुहुँदैन, कोही पनि भोकै मर्दैन। हामीले झन्डै–झन्डै भोकमरीको स्थिति अन्त्य गरेका छौं। गरिबी अन्त्य गर्नका लागि हामीले प्रयास गरेका छौं।’

उनले स्वास्थ्य बिमालाई परिवर्तन गरेर ३५ सय तिरेर १ लाखसम्मको उपचार गर्न पाइने व्यवस्था आफूले बनाएको बताए।

उनले झापाको विकासलाई आफूले तीव्रता दिएको दाबी गर्दै सबै काम नसकिएकोले दमकको विकासका लागि सधैं लाग्ने प्रतिवद्धता व्यक्त गरे।

उनले भने, ‘विकास सकिएको हुँदैन, अझै बाँकी हुन्छ। म प्रधानमन्त्री हुनुभन्दा अगाडि धेरै कठिन थियो। मूलभूत बाटाहरू पक्की भएका छन्, अब त्यसमा अरू कनेक्सन जोडिन बाँकी छ। दमक ठूलो नगरपालिका हो, यहाँको विकासका लागि हामी सधैँ लाग्नेछौं।’