भृकुटीमण्डपमा जारी दोस्रो विशेष महाधिवेशनमा कांग्रेस सभापति पदमा महामन्त्री गगनकुमार थापाको मात्र उम्मेदवारी परेको छ।

निर्वाचन समिति स्रोतका अनुसार सभापतिमा थापाबाहेक अरु कसैको उम्मेदवारी नपरेको हो। कसैको उम्मेदवारी नपरेपछि महामन्त्री थापा स्वतः सभापति निर्वाचित हुनेछन्।

यता संस्थापन पक्षसँग विशेष महाधिवेशन पक्षधर लगातार वार्तामा छ। बुधबार बिहान माहामन्त्रीद्वय थापा र विश्वप्रकाश शर्माले देउवासँग निर्णायक वार्ता गरेका थिए। तर वार्ता निष्कर्षविहिन बनेको छ।

यतिबेला महामन्त्रीद्वय विशेष महाधिवेशनबाट निर्वाचिन हुने अन्तरिम कार्यसमितिको वैधानिकताबारे कानुनविद्‍हरूसँग परामर्शमा रहेको बुझिएको छ।

उम्मेदवार मनोनयनको समय सकिसकेकोले निर्वाचन आयोगले दिउँसो १ बजे उम्मेदवारहरूको अन्तिम नामावली प्रकाशन गर्नेछ।

संस्थापनसँग कुरा नमिले विशेष महाधिवेशनले गगनको नेतृत्वमा कांग्रेसको नयाँ कार्यसमिति घोषणा गर्ने तयारी गरेको छ।