रास्वपा सभापति रवि लामिछानेलाई ३० लाखमा समानुपातिक कोटा बेचेको आरोप लागेको छ । यो आरोप उनका आलोचकले हैन, रास्वपाकै एक केन्द्रीय सदस्यले लगाएका हुन् । रविलाई सहकारी ठगीको बिगोका लागि तीस लाख चन्दा दिएका चितवनका डा. मनोहर प्रधानलाई समानुपातिक उम्मेद्वार बनाएपछि यस्तो गम्भीर आरोप लागेको हो । 

रास्वपाले निर्वाचन आयोगमा पेश गरेको समानुपातिक सूचीको आदिबासी जनजाति क्लस्टर तर्फबाट चौथो नम्बरमा रहेका प्रधान रास्वपाले सञ्चालन गरेको प्राइमरी इलेक्सनमा ८ हजार २ सय ९२ मत पाएर १७औं भएका थिए । तर, उनै  सत्रौ नम्बरका प्रधान ३० लाखका कारण समानुपातिक सूचीमा परे भने  सोही क्लस्टरमा १६ हजार १२ मत ल्याएर पहिलो भएका उत्तम बहादुर गुरूङ सूचीमै पारिएनन् ।

रविको गृहजिल्ला चितवनका प्रधान पेशाले चिकित्सक हुन् । उनी रास्वपाभन्दा पनि रविका फ्यान हुन् । रविलाई भगवान भन्दै उनका लागि जे पनि गर्न तयार प्रधानले रविलाई बुटवलको सुप्रिम सहकारीको बचत रकम अपचलन मुद्दामा आवश्यक २ करोड ७४ लाख ८४ हजार रकममध्ये तीस लाखको व्यक्तिगत चेक दिएका थिए ।

मेरिटोक्रेसीको चर्को वकालत गर्ने रविको पार्टीमा सत्रौं स्थानमा रहेको प्रधान सूचीमा पर्दा  नम्बरमा रहेका गुरूङ आउट  भएका छन् । यसको कारण खोज्दै जाँदा ‘ रविलाई ३० लाख दिएका, समानुपातिकमा परेका’ भन्दा अरू केही हैन ।

नेपालमा समानुपातिक सांसद भनेको सिमान्तकृत, पछाडि परेका र प्रत्यक्ष चुनावबाट चुनिन नसक्ने अवस्थाका जनताको प्रतिनिधित्व गराउन ल्याइएको समुन्नत व्यवस्था हो । तर, यसलाई नेताहरूका आफन्त र पैसावालहरूको कोटा बनाइएको छ । पुरानाले त्यही गरेर बदनाम गरेको यो लोकतान्त्त्रिक व्यवस्थापनलाई नयाँ भनिने रास्वपाले देखादेख कारोबार नै गरेको छ ।  

रवि लामिछानेले अदालतमा बिगो जमानत  बुझाएको ३० लाखको लिखत त्यसैको ज्यूँदोजाग्दो प्रमाण हो