जेनजी अगुवा सुधन गुरुङसहितका व्यक्तिले आफ्नो घर फेरि जलाउने धम्की दिएकोप्रति विघठित प्रतिनिधिसभाका सदस्य तथा एमाले नेता किसान श्रेष्ठले आपत्ति जनाएका छन्।

एमाले नेता किसान श्रेष्ठले जेनजी अगुवा सुदन गुरुरुसहितका व्यक्तिहरूले आफ्नो घरमै पुगेर फेरि घर जलाउने धम्की दिएको दाबी गरेका छन्।

शनिबार विज्ञप्ति जारी गर्दै श्रेष्ठले आफू काठमाडौंमा रहेका बेला सुदनको समूह सिमराको औराहास्थित आफ्नो घरमै गएर पुनःनिर्माणमा खटिएका कामदारलाई धम्क्याएको आरोप लगाए।

श्रेष्ठले भने, ‘लुटपाट र गुण्डागर्दी शैलीमा सुदन गुरुङ भन्ने व्यक्ति प्रवेश गरी २४ गते जलाइएका घर पुनःनिर्माण गर्ने मेरा कर्मचारी, कामदार लाई धम्क्याउने र घर फेरि जलाउँछु भन्दै तेरो नेतालाई जे पनि हुनसक्छ भनेर धम्की दिएको घटनाको घोर भर्त्सना गर्दछु।’

श्रेष्ठले जेनजीका नाममा भइरहेको आतंक रोकी शान्ति सुरक्षाको प्रत्याभूति गर्न सरकारसमक्ष माग गरे।