कर्णाली प्रदेशका मुख्यमन्त्री यामलाल कँडेलले मन्त्रिपरिषद् विस्तार गरेका छन्। 

मुख्यमन्त्री कँडेलले मंगलबार ६ जना मन्त्रीलाई नियुक्त गरेर मन्त्रिपरिषद् विस्तार गरेका हुन्। यससँगै कर्णाली सरकारले पूर्णता पाएकाे छ।

नेकपा एमालेबाट शेरबहादुर बुढा भौतिक पूर्वाधार तथा सहरी विकासमन्त्री, विनोदकुमार शाह भूमि, व्यवस्था, कृषि तथा सहकारीमन्त्री बनेका छन्। यस्तै गोमता विक भौतिक राज्यमन्त्री नियुक्त भएकी छन्।

त्यसैगरी नेकपा माओवादी केन्द्रबाट आर्थिक मामिला तथा योजना मन्त्रीमा महेन्द्र केसी, ऊर्जा तथा जलस्रोत मन्त्रीमा रणसिंह परियार, सामाजिक विकास मन्त्रीमा वीरबहादुर शाही र दुर्गबहादुर रावत उद्योग, पर्यटन, वन तथा वातावरणमन्त्री बनेका छन्।

नवनियुक्त ६ जना मन्त्रीले पद तथा गोपनीयताको शपथ लिएका छन्। उनीहरूले प्रदेश प्रमुख तिलक परियारलसमक्ष शपथ लिएका हुन्।