नेपाल र थाइल्याण्डबीच पर्यटन र संस्कृतिसँग सम्बन्धित दुई समझदारीपत्रमा हस्ताक्षर भएको छ।
थाइल्याण्डको औपचारिक भ्रमणमा रहेका प्रधानमन्त्री केपी शर्मा ओली र थाइल्याण्डका प्रधानमन्त्री पेथोङ्थान् शिनावात्राको उपस्थितिमा समझदारीपत्रमा हस्ताक्षर भएको हो।
त्यस्तै नेपालका उद्योगी र त्यहाँका उद्योगीहरूबिच पनि सम्झौता भएका छन्।
000
सरकारले काठमाडौंको तीनकुनेमा भएको प्रदर्शनमा ज्यान गुमाएकाको परिवारलाई १०/१० लाख दिने निर्णय गरेको छ।
गृहमन्त्रीस्तरीय बैठकले मृतक पत्रकार सुरेश रजक र कीर्तिपुरका सविन महर्जनको परिवारलाई १०/१० लाख रुपैयाँ दिने निर्णय गरेको हाे।
000
नेपाल प्रहरीले चैत १५ गते भएको राजावादी आन्दोलनका क्रममा २० जनामाथि गोली चलेको जानकारी गराएको छ।
बुधबार पत्रकार सम्मेलनको आयोजना गरी प्रहरी प्रवक्ता डीआईजी दिनेश आचार्यले २० जनामाथि गोली चलेको र गोली लाग्नेमध्ये २ महिला र १८ पुरुष रहेको जानकारी दिए।
त्यस्तै प्रहरीले राजावादी आन्दोलनका क्रममा मञ्चमा राष्ट्रिय गान बज्दाबज्दै टियर ग्यास हानेको भनेर गलत आरोप लागेको पनि उनले प्रष्ट पारेका छन्। सामाजिक सञ्जालमा आएको उक्त भिडियो फेक भएको उनको दाबी छ।
000
टोखाबाट ट्रकमा बरामद भएको २५ करोड विदेशी मुद्राका मालिक नेपालकै विवादित व्यापारी भएको खुलेको छ।
उक्त रकम सिन्धुपाल्चोकको भोटेकोसी गाउँपालिका ४ घर भई टोखा नगरपालिका १० महादेवटार हाइटमा बस्ने नारायण पौडेलले चीन पठाउन लागेको राजश्व अनुसन्धान विभागले पत्ता लगाएको छ।
पौडेल यसअघि पनि पटक पटक पक्राउ परेका व्यक्ति रहेकाे प्रहरीले जनाएकाे छ।
000
नेपाल शिक्षक महासंघ राष्ट्रिय समितिले बुधबार माइतीघरदेखि बिजुलीबजारसम्म प्रदर्शन र्यालीसहित विरोध प्रदर्शन गरेको छ।
विगतका सबै सहमति सम्बोधन हुने गरी नयाँ विद्यालय शिक्षा ऐन जारी गर्न दबाब स्वरूप प्रदर्शन गरिएको हो।
सयौँको संख्यामा रहेका शिक्षकहरूले आफ्नो माग पुरा गर्न सरकारले ढिलाइ गरेको भन्दै नाराबाजी गरेका थिए।
000
नेपाल विद्युत् प्राधिकरणको कार्यकारी निर्देशकबाट हटाइएका कुलमान घिसिङ र नवनियुक्त हितेन्द्रदेव शाक्य दुवैको रिट आज पनि हेर्दाहेर्दैमा राखिएको छ।
सर्वोच्चका न्यायाधीशद्वय कुमार चुडाल र नित्यानन्द पाण्डेयको इजलासमा दुवैका रिटमाथि सुनुवाइ भएको थियो।
तर, सुनुवाइ नसकिएपछि दुवै रिट हेर्दाहेर्दैमा राखिएको हाे।
000
प्रमुख सेनानी रामचन्द्र श्रेष्ठको नेतृत्वमा नेपाली सेनाको टोली मेडिकल राहत बोकेर म्यानमार प्रस्थान गरेको छ।
हालै गएको विनाशकारी भूकम्पका कारण भएको व्यापक धनजनको क्षति पश्चात् नेपाल सरकारको निर्णयबमोजिम मेडिकल राहतसहित नेपाली सेनाको टोली बुधबार म्यानमार प्रस्थान गरेको सेनाले जनाएको छ।
प्रमुख सेनानी श्रेष्ठको नेतृत्वमा १२ जना चिकित्सकीय टिम, ४ जना बन्दोबस्ती सहायता टिम र ६ जना क्रु मेम्बरसहित २२ सदस्यीय टोली नेपाली सेनाको विमानद्वारा म्यानमारतर्फ प्रस्थान गरेको हो।
000
पछिल्ला दिन काठमाडौंमा वायु प्रदूषण उच्च भएको छ।
वातावरण विभागका अनुसार काठमाडौंको वायु प्रदूषण निकै अस्वस्थकरको तहमा पुगेको छ।
काठमाडौं सोमबार र मंगलबार लगातार संसारकै प्रदूषित सहर बनेको थियो। बुधबार झन् वायु प्रदूषण बढेको थियाे।
000
चैत १५ गते शुक्रबार राजावादीहरूले जडीबुटी उत्पादन तथा प्रशोधन कम्पनी लिमिटेडमा गरेको तोडफोडमा २८ करोड बराबरको क्षति भएको प्रारम्भिक अनुमान गरिएको छ।
जडीबुटी कम्पनीकी महाप्रबन्धक संगीता यादवका अनुसार प्रारम्भिक विश्लेषणअनुसार आन्दोलनकारीहरूले गरेको आगजानीबाट २८ करोड बराबरको क्षति भएको विवरण छ।
000
आफूलाई भारतका खुंखार गुन्डा नाइके बताउँदै नेपालमा शृंखलाबद्ध अपराध गरिरहेका व्यक्ति बाँकेमा पक्राउ परेका छन्।
इलाका प्रहरी कार्यालय कोहलपुरले सुर्खेतको भेरीगंगा नगरपालिका ७ काठेघारी घर भई हाल बाँकेको कोहलपुर ५ बस्ने ४१ वर्षका रामबहादुर बुढा क्षेत्रीलाई पक्राउ गरेको हो।
उनले विदेशी नम्बरबाट ह्वाटसएप सञ्चालन गरी आफूलाई लोरेन्स बिस्नोई र अनमोल बिस्नोई हो भनी व्यवसायीलाई धम्क्याएर ५ करोड भारु माग गरेको आरोप छ।
