आगामी मार्च १६ मा अमेरिकी अधिनस्थ पोर्टो रिकोमा हुन गैरहेको मिस वर्ल्डको फिनालेमा मिस वर्ल्ड नेपाल नम्रता श्रेष्ठ पनि सहभागी हुने भएकी छिन् । हेड टु हेड च्यालेन्जबाट अन्तिम ३० मा पुगेको आधारमा उनी फिनालेमा सहभागी हुन लागेकी हुन् ।
आयोजकले जनाएअनुसार फिनालेमा सेमीफाइनलमा पुगिसकेका १५ र निर्णायकले छनौट गरेका २५ गरी ४० जना मात्र सहभागी हुनेछन् ।
७०औं संस्करणको मिस वर्ल्ड २०२१ को सुरूमा ९७ देशका सुन्दरीहरू सहभागी थिए । विभिन्न चरणका प्रतिस्पर्धाबाट बाहिरिएर सेमिफाइनल चरणमा प्रवेश गर्ने बेलामा केही प्रतियोगी र व्यवस्थापकलाई कोभिड संक्रमण भएपछि प्रतियोगिता स्थगित गरिएको थियो ।
मिस नेपालको अन्तिम प्रतिस्पर्धामा सहभागी २० प्रतिस्पर्धीलाई उछिन्दै नम्रता श्रेष्ठ मिस नेपाल वर्ल्ड २०२० बिजेता बनेकी थिइन् । यसअघि उनि ‘मिस नेपाल–२०१६’ मा पनि सहभागी भएकी थिइन् । त्यतिबेला अन्तिम पाँचसम्मको यात्रा तय गरेकी उनी यसपटक भने ताजको हकदार बनिन् ।
समाजशास्त्रमा स्नातकोत्तर उनी पेशाले एक किन्डर गार्डेन शिक्षिका हुन्।
