आईसीसी यू-१९ महिला विश्वकप क्रिकेटको आफ्नो पहिलो खेलमा नेपाल बंगलादेशसँग ५ विकेटले पराजित भएको छ।

मलेसियाको बांगीमा भएको खेलमा नेपालले निराशाजनक प्रदर्शन गर्दै बंगलादेशलाई ५३ रनको लक्ष्य दिएको थियो। सामान्य लक्ष्य पछ्याएको बंगलादेशले १३ ओभर २ बलमा ५ विकेट गुमाएर पूरा गर्‍यो।

बंगलादेशकी सादिया इस्लामले सर्वाधिक १६ रन बनाइन्। बलिङमा नेपालकी कप्तान पूजा महतो, सिमाना केसी, रिया शर्मा र रचना चौधरीले एकएक विकेट लिए।

त्यसअघि टस हारेर पहिला ब्याटिङ गरेको नेपालले १८ ओभर २ बलमा ५२ रन मात्र बनाउन सकेको थियो। नेपालका लागि ओपनर सना प्रवीणले सर्वाधिक १९ रन बनाइन्। त्यस्तै, सिमाना केसी १०, रिया शर्मा ५, अलिशा यादव ४, तिर्सना विक र रचना चौधरी समान ३/३, कप्तान पूजा महतो २, सावित्री धामी र किरण कुँवरले समान १/१ रन बनाए। सोनी पाख्रिन र अनु कडायतले खाता नै खोल्न सकेनन्।

बलिङमा बंगलादेशकी जन्नतुल माउवाले सर्वाधिक दुई विकेट लिइन्।

नेपाल आईसीसी यू-१९ महिला विश्वकपमा पहिलोपटक सहभागी भएको हो। अब दोस्रो खेल नेपालले सोमबार स्कटल्यान्डसँग खेल्नेछ।