विश्वकपकाे तयारीमा रहेकाे नेपाल क्यानडासँगकाे पहिलाे अभ्यास खेलमा ६३ रनले पराजित भएकाे छ।

साेमबार राति अमेरिकास्थित डालासको ग्रान्ड प्रेरी क्रिकेट रंगशालामा क्यानडाले दिएकाे १८४ रनकाे लक्ष्य पछ्याएकाे नेपाल १९.३ ओभरमा १ सय २० रन बनाएर अलआउट भयाे।

उक्त लक्ष्य पछ्याउँदा नेपालका कुशल मल्लले ३७, अनिल शाह २४, आशिफ शेख २२ र कुशल भुर्तेल १० रनमा आउट भए।

अन्य खेलाडीले दाेहाेराे अंक जाेड्न सकेनन्।

क्यानडाका डिल्लाेन हेलिगरले ४ तथा जर्मी गाेर्डन र कप्तान साद बिन जाफरले २-२ विकेट लिए।

त्यसअघि टस हारेर पहिलाे ब्याटिङ गरेकाे क्यानडाले निर्धारित २० ओभरमा ७ विकेट गुमाएर १ सय ८३ रन बनाएकाे थियाे।

क्यनडाका निकाेलस कर्टनले अर्धशत प्रहार गरे। भने, नभनित धलिवालले ३२ र रवीन्दरपाल सिंहले अविजित ४१ रन प्रहार गरे।

नेपालका अविनाश बाेहराले २ तथा सागर ढकाल, ललित राजवंशी, गुल्सन झा, साेमपाल कामी र करण केसीले १-१ विकेट लिए।