दक्षिण अफ्रिकामा जारी आईसीसी यू–१९ विश्वकप क्रिकेटको सुपर सिक्समा नेपालको भिडन्त भारत र बंगलादेशसँग हुने भएको छ। 

समूह डी मा रहेको नेपालले शुक्रबार अफगानिस्तानलाई मुश्किलले पराजित गर्दै तेस्रो स्थान हासिल गरेर सुपर सिक्स यात्रा तय गरेको छ । यो समुहबाट नेपालसँगै पाकिस्तान र न्युजिल्याण्ड सुपर सक्समा पुगिसकेका छन्। यद्यपि, यो समुहको विजेता र उपविजेताको टुंगो भने शनिबार हुने पाकिस्तान र न्यूजिल्यान्डबिचको खेलबाट हुने छ। 

आईसीसी यू–१९ विश्वकपमा नेपालसहित ४ समूहका ३–३ गरी १२ टिम सुपर सिक्समा पुग्नेछन्। सुपर सिक्समा समूह ए र डी तथा समूह बी र सीमा रहेका टिमबिच प्रतिस्पर्धा हुनेछ ।

 समूह ए बाट भारत र बंगलादेश यसअघि नै सुपर सिक्समा पुगिसकेका छन्। यस समूहको तेस्रो टिमको निर्णय भने अमेरिका र आयरल्याण्डबीच शनिबार हुने खेलले गर्ने छ।

सुपर सिक्समा समूह ए को विजेताले समूह डिको दोस्रो र तेस्रो टिमसँग खेल्नेछ। उपविजेता हुने टिमले अर्को समूहको पहिलो र तेस्रो अर्थात समूह चरणमा तेस्रो हुने टिमले सुपर सिक्समा अर्को समूहको पहिलो र दोस्रो टिमसँग प्रतिस्पर्धा गर्नेछ ।

नेपालले सुपर सिक्सको पहिलो खेल जनवरी ३१ मा समूह ए को उपविजेता र फेबु्रअरी २ मा समूह विजेतासँग प्रतिस्पर्धा गर्ने छ।