नेपाल प्रिमियर लिग (एनपीएल) अन्तर्गत लुम्बिनी लायन्सले अपराजित यात्रा जारी राखेको छ। लुम्बिनीले जनकपुर बोल्ट्सलाई १६ रनले हरायो।

लुम्बिनीले दिएको १५० रनको लक्ष्य पछ्याएको जनकपुरले २० ओभरमा ८ विकेटको क्षतिमा १३३ रन मात्र बनाउन सक्यो।

जनकपुरका लागि हरमीत सिंहले ३३, आदित्य महताले ३०, सैफ हसनले २८, तृत राज दासले १८ रन बनाउँदा अन्य ब्याट्सम्यानले दोहोरो अंकमा रन बनाउन सकेनन्।

बलिङतर्फ लुम्बिनीका डार्सी शर्टले तीन तथा शेर मल्ल र तिलक भण्डारीले दुई–दुई विकेट लिए। रुवेन ट्रम्पलमनले एक विकेट हात पारे।

त्यसअघि टीयू क्रिकेट मैदानमा टस हारेर पहिला ब्याटिङ गरेको लुम्बिनीले निर्धारित २० ओभरमा ८ विकेटको क्षतिमा १४९ रन बनाएको थियो।

लुम्बिनीका लागि रोहित पौडेलले ३४, निरोशन डिकवेलाले २७, दीलिप नाथले २५ तथा आसिफ शेखले २१ रन जोडेका थिए। रुबेन ट्रम्पलमनले १५ तथा शमिम हुसेनले १३ रन बनाए।

बलिङतर्फ जनकपुरका राहुल यादव र विशाल शुस्लिङले दुई–दुई तथा हरमीत सिंह, ललित राजवंशी र अभिषेक तिवारीले एक–एक विकेट लिए।

चार खेलमा तीन जित र एक खेल रद्ध गरी ७ अंक जोडेको लुम्बिनी अंकतालिकाको शीर्षस्थानमा यथावत छ।

जनकपुर भने ५ खेलमा तीन हार र दुई जितसहित ४ अंकका साथ तालिकाको चौथो स्थानमा छ।