फिफा विश्वकपमा एसियाली राष्ट्र दक्षिण कोरियाले पनि जितका साथ प्रतियोगितामा विजयी शुरुवात गरेको छ।

मेक्सिकन शहर जापोपानमा सम्पन्न समूह ए तफको दोस्रो खेलमा दक्षिण कोरियाले चेक गणतन्त्रमाथि २–१ को रोमाञ्चक र पूनःरागमन जित निकाल्दै विजयी शुरुवात गरेको हो।

खेलमा तीनै गोलहरु दोस्रो हाफमा सम्पन्न भए। यद्यपि खेलमा अग्रता भने चेक गणतन्त्रले लिएको थियो । खेलको ५९औं मिनटमा लाडिस्लाव क्रेसीले पहिलो गोल गरे।

तर, खेलमा चेक गणतन्त्रले त्यो गोलको खुशी धेरैबेर मनाउन सकेन। खेलको ६७औं मिनटमा ह्वाङ इन बोमले दक्षिण कोरियाका लागि बराबरी गोल गरे भने ८०औं मिनटमा ओह ह्युन ग्युले दोस्रो गोल गर्दै एसियाली टोलीको जित पक्का गरे।

दक्षिण कोरियाले अब आफ्नो दोस्रो खेल १८ जुनका लागि आयोजक मेक्सिकोसँग खेल्नेछ। सोही दिन चेक गणतन्त्रले दक्षिण अफ्रिकाको सामना गर्नेछ।

समूहको शिर्ष दुई टोली सोझै नकआउट चरणमा प्रवेश गर्नेछन् भने उत्कृष्ट तेस्रो स्थान हासिल गर्ने आठ टोलीहरुले पनि नकआउट चरणमा आफ्नो स्थान पक्का गर्नेछन्।