भारत भ्रमणमा रहेको नेपाल ए क्रिकेट टोलीले आसामविरुद्धको पाँच खेलको सिरिज जितेको छ।

सोमबार भारतको गुवाहाटीमा सम्पन्न टी-२० सिरिजको अन्तिम खेलमा नेपाल एले आसामलाई ४४ रनले पराजित गर्दै सिरिजमा ३-२ को जित निकालेको हो।

नेपालले दिएको २०९ रनको बलियो लक्ष्य पछ्याएको आसामले निर्धारित २० ओभरमा ९ विकेट गुमाउँदै १६४ रन मात्र जोड्न सक्यो।

आसामका लागि भार्गव लहकरले सर्वाधिक २९ रनको योगदान दिए। 

बलिङमा नेपाल एका पवन सर्राफ, शेर मल्ल र आकाश चन्दले समान २—२ विकेट लिए।

टस जितेर पहिले ब्याटिङ गरेको नेपाल ‘ए’ले निर्धारित २० ओभरमा ६ विकेट गुमाउँदै २०८ रन बनाएको थियो।

नेपालका लागि सन्दीप जोराले सर्वाधिक ६४ रन बनाए। ‍त्यस्तै शुभ कंसाकारले ४१ तथा इशान पाण्डेले ३२ रन बनाए।

बलिङमा आसामका आयुष्मान मलाकार र अभिनव चौधरीले समान २-२ विकेट लिए।