पोखरा एभेन्जर्सले नेपाल प्रिमियर लिग (एनपीएल)को दोस्रो संस्करणमा पहिलो जित हात पारेको छ।

ब्याटिङमा सुमित वर्मा र बलिङमा स्पीनर विपिन खत्री चम्किएपछि पोखराले साविक विजेता जनकपुर बोल्टसलाई २५ रनले पराजित गरेको हो। यो जनकपुरको लगातार तेस्रो हार हो। पोखराले ३ खेलमा पहिलो जित निकाल्दै २ अंक जोडेको छ।

पोखराले दिएको १५६ रनको लक्ष्य पछ्याएको जनकपुरले निर्धारित २० ओभरमा ९ विकेट गुमाएर १३० रन मात्र बनाउन सक्यो।

बोल्ट्सका लागि वायने पार्नेलले अर्धशतक प्रहार गरेपनि जित दिलाउन सकेनन्।

बलिङमा पोखराका विपिन खत्रीले ४ ओभरमा १५ रन मात्र खर्चेर ४ विकेट लिए।

त्यसअघि टस जितेर पहिले ब्याटिङ रोजेको पोखराले निर्धारित २० ओभरमा ६ विकेट गुमाएर १५५ रन बनाएको थियो।

पोखरा यस सिजन टस जितेर ब्याटिङ गर्ने पहिलो टिम समेत हो। 

पोखराका लागि सुमित वर्माले २९ बल खेल्दै २ चौका र ४ छक्का मद्दतमा सर्वाधिक ५० रन बनाए।

बलिङमा साविक विजेता जनकपुरका लागि सञ्जय कृष्णमूर्तिले ४ ओभरमा २१ रन खर्चेर ३ विकेट लिए।