भोलिदेखि काठमाडौंको कीर्तिपुरस्थित त्रिवि क्रिकेट मैदानमा नेपाल प्रिमियर लिग (एनपीएल) सुरु हुँदैछ।

एनपीएल हेर्न सवारी लिएर जाने दर्शकका लागि उपत्यका ट्राफिक प्रहरी कार्यालयले पार्किङको व्यवस्थापन गरेको छ। त्यस्तै खेल अवधिभर टीयू परिसरमा सवारी डाइभर्सन गरेको छ।

ट्राफिक प्रहरीले जथाभावी पार्किङ नगरी तोकिएको स्थानमा मात्र पार्किङ गर्न अनुरोधसमेत गरेको छ। तोकिएको स्थानभन्दा अन्यत्र पार्किङ गरेको पाइए कानुनबमोजिम कारबाही हुने प्रहरीले जनाएको छ।

यस्तो छ पार्किङ व्यवस्थापन–

१. भीआईपी र भीभीआईपीका सवारी साधनलाई– टीयू ग्राउण्ड मेन गेटभित्र

२. दर्शकका सवारी साधनलाई– तीनकुने नजिकको ग्राउण्ड, घडी आइल्याण्डको नजिकको ग्राउण्ड, आयुर्वेदिक अस्पताल परिसर, टीयू गेटदेखी भीसी कार्यालयसम्मको सडक किनार, सुन्दरीघाट सानेपा खोला करिडोर।