ललितपुरका प्रमुख जिल्ला अधिकारी सुमन घिमिरेले सेवा प्रवाहलाई सहज बनाउँदै संस्कृति, सम्पदाको संरक्षणमा सहजीकरणको भूमिका निर्वाह गर्ने प्रतिवद्धता व्यक्त गरेका छन्।

जिल्ला प्रशासन कार्यालयमा आइतबार सञ्चारकर्मीसँग कुराकानी गर्दै उनले सो प्रतिबद्धता व्यक्त गरेका हुन्। जात्रा, पर्व संस्कृतिमा मौलिक परम्पराको हिसाबले ललितपुरको विशिष्ट महत्व रहेको र त्यसलाई आत्मसात गरेको प्रजिअ घिमिरले बताए।

उनले भने, ‘तपाईंहरूको दिएको सुझावलाई ध्यानमा राखेर यहाँका पुरात्तात्विक स्थल, पोखरी, गुठीको जग्गा संरक्षणमा ध्यान दिने छौं।’

आफूले चार पाँचवटा विषयलाई प्राथमिकताका राखेको उल्लेख गर्दै प्रमुख जिल्ला अधिकारी घिमिरले भने, ‘सरकारी कार्यालयको सेवाप्रवाहको चुस्तता, शान्तिसुरक्षाको व्यवस्थापन, समुदायसँगको संवाद र समन्वय गर्दै विकास निर्माणमा सहजीकरण र विपत व्यवस्थापनको काम लगायत क्षेत्रलाई प्राथमिकतामा राख्नेछु। राष्ट्रिय परिचयपत्रका सम्बन्धमा सोधपुछ गर्ने कार्यलाई सहज बनाइदिएको छु।’

सञ्चारकर्मीहरूले सूचना प्रवाहलाई थप सहजीकरण गर्नुपर्ने, जिल्लाको भूगोल, आदिवासी जनजातिको बहुलता, यहाँको सांस्कृतिक संवेदनशीलताप्रति प्रशासनले महशुस गर्नुपर्ने, शान्तिसुरक्षाका विविध चुनौती विषयमा आ-आफ्नो धारणा राखेपछि प्रजिअ घिमिरेले त्यसलाई सम्बोधन गरेका हुन्।

सो अवसरमा नेवाः पत्रकार राष्ट्रिय दबूका वरिष्ठ उपाध्यक्ष सुनील महर्जनले प्रशासनले गर्नुपर्ने नियमित दायित्वका अतिरिक्त विभिन्न जात्रा,पर्व, संस्कृति सम्पदा जोगाउने विषयमा पहलकदमी, सहजीकरण र समन्वयको भूमिका निर्वाह गर्नुपर्नेमा जोड दिए।

नेपाल आदिवासी जनजाति पत्रकार महासंघका सचिवसमेत रहेका महर्जनले सूचना प्रवाहलाई थप व्यवस्थित गर्नुपर्ने, मातृभाषाका पत्रकारिता गर्ने पत्रकारलाई प्रशासनले समेट्नुपर्ने र जनताको पीरमर्का बुझ्नुपर्ने बताए।

सो अवसरमा सम्पदा नेपाल टेलिभिजनका प्रमुख विश्वन्तर शाक्यले गुठी जग्गा संरक्षण, अतिक्रमणमा परेका सम्पदा र जग्गाको संरक्षणमा प्रशासनको सशक्तको भूमिका हुनुपर्ने खाँचो औंल्याए।

नेवाः पत्रकार राष्ट्रिय दबूका ललितपुर शाखा सदस्य सनि शाक्यले लागु औषध दुर्व्यसनीको समस्या, शान्तिसुरक्षाका विविध चुनौतीबारे आफ्नो धारणा राखे।

सञ्चारकर्मी हर्कबहादुर श्रेष्ठ, नेपालमण्डल टेलिभिजनका रामराजा बज्राचार्यले अव्यवस्थित बजार, मानिसहरूले भोग्नु परिरहेको पाकेटमारको समस्या लगायत विषयमा आ-आफ्नो धारणा राखे।