‘अब के होला?’ कुनै पुस्तक पढ्दै जाँदा यस्तो जिज्ञासा आयो भने सम्झनूस् कृतिमा पक्कै दम छ। समय, परिवेश, पात्र र घटनाक्रम बग्दै जानुको विशेषताका रुपमा यसलाई लिन सकिन्छ।

शब्दमा मीठास, वाक्यमा लालित्य, अनुच्छेदमा शक्ति,  बिम्ब र प्रतीककाे  आकर्षक प्रयाेग  छ भने कुनै पाठकको मनमा पुस्तकप्रति प्रेम हुन्छ। र, प्रेमको अन्तिम बिन्दु बनिदिन्छ पुस्तकको अन्तिम पाना। अर्थात, पुस्तक र पाठकबीचको सम्बन्धले पूर्णता पाउँछ। पुस्तक पाठकको मनमा सधैभरीका लागि बसिदिन्छ र ऊ पुस्तकलाई सुरक्षित साथ कोठाको एक कुनामा सजाइदिन्छ।

वर्षेनी ५० भन्दा बढी नयाँ लेखकको आगमन र सयभन्दा बढी पुस्तक प्रकाशनले पाठकलाई यो अवसर कम नै मिल्छ। अझ थुप्रै नयाँ लेखकहरुको सवालमा त पुस्तक प्रकाशन गर्नु लेखकका रुपमा आफ्नो नाम दर्ता गराउनु सरह हुँदै आएको छ। यसरी लेखिएको नाम कतिबेला मेटिने हो पत्तो नै हुँदैन।

दाइ, म किन नजाउँ विदेश ?

यही भिडमा मिसिएर कतिपय नयाँ लेखक भने आफ्नो भविष्य सुनिश्चित गर्न पुग्छन्। पछिल्लो समय बुलबुल प्रकाशनमार्फत ‘प्राञ्जल’ उपन्यास लिएर बजारमा आएका प्रयास दुमी राई यसको एक उदाहरण हुन्।

युवा अवस्थाको प्रेम सम्बन्धलाई केलाएर लेखिएको उपन्यासले प्रेमका विभिन्न आयामहरुबारे बोलेको छ। उपन्यास विशेषता भनेकै आधुनिक प्रेमको सफल चित्रण हाे भन्दा हुन्छ।

मुख्य पात्र रिहान (म पात्र), आत्मा, हृदय र झरी (प्राञ्जल) को कथामा उपन्यास केन्द्रित छ। घर छाडेर पढ्न सहर पसेका युवा प्रेममा कसरी पर्छन् र त्यसले व्यक्तिगत, पारिवारिक तथा सामाजिक रुपमा कस्तो असर पार्छ भन्ने कुरा उपन्यासमा कुँदिएको छ।

‘प्लस टु’ जेनेरेसनको मनोविज्ञान कस्तो हुन्छ र समयाक्रमअनुसार उनीहरुको सोच, विचार, व्यवहार र कार्यशैलीमा कसरी परिवर्तन हुन्छ भन्ने कुरालाई सम्बन्धका विभिन्न आयामहरुमार्फत प्रस्तुत गरिएको छ।