बाँके, नेपालगञ्जको रानी तलाउबाट पूर्व एमपी स्कुलतर्फ जाने बाटोमा शान्तिमार्ग भन्ने बस्ती छ । नेपालगञ्ज नगारपालिकाको वडा नम्बर ८ को शान्तिमार्गमा सबैको पक्की घर छन् । तर त्यही शान्तिमार्गको ५ सय मिटरभित्र टिनको छाना भएको एउटा सानो घर छ । यो घर बलराम हेमकारको हो ।

कुनै समयका चर्चित अधिवक्ता, जिल्ला बार एसोसिएसनमा काम गरिसकेका बलराम प्राध्यपकसमेत हुन् । यद्यपि यतिबेला उनी ज्योतिषको काम गरिरहेका छन् ।

यी व्यक्ति हुन् नेपालगञ्जको चर्चित हेमकार परिवार हत्याकाण्डका सम्बन्धमा किटानी जाहेरी दिने व्यक्ति अर्थात् बलराम हेमकार ।

उमेरले उनी यतिबेला ६५ वर्षका भए । कपाल र दाह्री फुलेर सेतै भए पनि बलराम अझै पनि आफ्ना आमा गुलाबदेवी, दाजु जगदेव हेमकार, भाउजू सीतादेवी हेमकार, भतिज दीपक हेमकार र घरमा काम गर्ने १५ वर्षीय किशोर राशनिश्चर चौधरीको हत्यारालाई कानुनी कठघरामा ल्याएर कारबाही गराउने भन्दै लागिपरेका छन् ।

नेपालगञ्ज सदरलाइनको १४ वर्ष पुरानो हेमकार परिवार हत्याकाण्डका दोषी दीपक हेमकारको आफ्नै ससुरा किशोरीलाल सोनी र श्रीमती दीपा सोनी भएको भन्दै घटनाको ठीक दुई वर्षपछि अर्थात् २०६४ साल फागुन २४ गते मृतक दीपक हेमकारका काका बलराम हेमकारले प्रहरीमा किटानी जाहेरी दिएका थिए ।

सुरुमा आफै जिल्ला प्रहरी कार्यालय पुगेर किटानी जाहेरी दिन खोजे पनि प्रहरीले लिन नमानेकाले उनले हुलाकमार्फत किटानी जाहेरी पठाएका थिए । त्यही किटानी जाहेरीमार्फत प्रहरीले किशोरीलाल सोनी र दीपा सानीविरुद्ध कर्तव्य ज्यानको अनुसन्धान गर्दै मुद्दा दायर गरेको थियो ।

पहिले २०६४ साल फागुन २४ गते मृतक दीपक हेमकारका काका तथा जगदेव हेमकारका भाइ बलराम हेमकारले दिएको यो जाहेरी हेरौँ ।