इलामबाट प्रतिनिधिसभा सदस्यका लागि २५ जनाले उम्मेदवारी दिएका छन्।

जिल्लामा दुई पार्टीका जिल्ला अध्यक्षबीच प्रतिस्पर्धा हुने भएको छ। नेकपा (एकीकृत समाजवादी)का सम्मानित नेता झलनाथ खनाल र नेकपा (एमाले)का उपाध्यक्ष सुवास नेम्वाङले यही जिल्लाबाट उम्मेदवारी दिएका छन्।विगत वर्षमा एउटै पार्टीबाट दुई क्षेत्रबाट निर्वाचित हुँदै आएका उनस्हरू यसपटक फरकफरक दलबाट उम्मेदवारी मनोनयन दर्ता गराएका हुन्।

उनीहरूसँगै इलाममा प्रतिनिधिसभामा २५ र प्रदेशसभामा २९ जनाले उम्मेदवारी दर्ता गराएका छन्। पूर्वप्रधानमन्त्रीसमेत रहनुभएका झलनाथ खनालको इलाम क्षेत्र नं १ मा ३ स्वतन्त्रसहित प्रतिनिधिसभामा ११ जनाले उम्मेदवारी दिएका छन्।

प्रदेशसभातर्फ इलाम क्षेत्र नं १ को (क) मा आठ जना र इलाम क्षेत्र नं १ को (ख) मा छ जनाले उम्मेदवारी दिएका छन्। खनालसँग प्रतिस्पर्धाका लागि नेकपा (एमाले)का तर्फबाट एमाले इलामका अध्यक्ष महेश बस्नेतले उम्मेदवारी दर्ता गराएका हुन्।

पूर्वसभामुख नेम्वाङले जित्दै आएको इलाम क्षेत्र नं २ मा प्रतिनिधिसभातर्फ दुई  स्वतन्त्रसहित १४ जनाले उम्मेदवारी दिएका छन्।प्रदेशसभातर्फ इलाम क्षेत्र नं २ को (क) मा आठ जना र इलाम क्षेत्र नं २ को (ख) मा १ स्वतन्त्रसहित आठ जनाले उम्मेदवारी दिएका छन।

नेम्वाङ आफैँ आएर मनोनयन गरेका भने खनालका तर्फबाट उनकै पार्टीका प्रतिनिधिबाट मनोनयन दर्ता भयो। नेम्वाङसँग प्रतिस्पर्धाका लागि गठबन्धनका तर्फबाट नेपाली कांग्रेसका जिल्ला सभापति डम्बरबहादुर खड्काले मनोनयन दर्ता गराएका छन्। खनालले वारेसनाममार्फत गठबन्धनकोतर्फबाट उम्मदेवारी दर्ता गराएका छन्। दुई प्रतिनिधिसभा र चार प्रदेशसभा रहेको इलाममा दुई लाख २४ हजार सात सय ७८ मतदाता रहेका छन्।

इलाममा यस पटकको चुनाव निकै रोमाञ्चक हुने अनुमान गरिएको छ। ठूला नेतासँग जिल्ला अध्यक्षको प्रतिस्पर्धा निकै कडा हुने अनुमान लगाउन सकिन्छ।

पूर्वप्रधानमन्त्री खनालले पार्टी नै परिवर्तन गरेर कांग्रेससँगको सहकार्यमा मत लिनुपर्ने हुन्छ। उता नेम्वाङका प्रतिस्पर्धी नेपाली कांग्रेसका जिल्ला सभापति पनि समाजसेवी र जिल्लाकै लोकप्रिय नेताकारुपमा परिचित छन्।