ललितपुरको पुल्चोकमा भएको रातो मत्स्येन्द्रनाथको रथ यात्रा तान्ने क्रममा भएको झडप ट्राफिक प्रहरी जवानलाई कुटपिट गर्ने ९ जना पक्राउ परेका छन्। 

पक्राउ पर्नेमा ललितपुर महानगरपालिका १६ गावाहालका ४० वर्षीय को महेश बज्राचार्य, वडा ११ बंगलामुखी, ३९ वर्षीय पृथ बिन्दु महर्जन, वडा २१ का ३८ वर्षीय अशोज कुमार महर्जन, वडा १६ का ४० वर्षीय रविन शाक्य र ६ का ३६ वर्षीय रवि शाक्य रहेका छन्।

यता महालक्ष्मी नगरपालिका वडा १ इमाडोलका ४३ वर्षीय सुविन शाक्य र इमाडोलका ४६ वर्षीय ध्रुवराज बज्राचार्य, भक्तपुर ठिमी ८ का ३२ वर्षीय श्याम श्रेष्ठ र काठमाडाैं महानगरपालिका वडा १६ का ४० वर्षीय  यादवलाल कायस्थ रहेका छन्।

प्रशासनको निषेधका बीच स्थानीय युवाले मत्स्येन्द्रनाथको रथ तानेका थिए। सोही समयमा कोभिड–१९ (कोरोना भाइरस) को महामारीका बीच ड्यूटीमा खटिएका जवान कमलप्रसाद घिमिरेमाथि कुटपिट भएको हो।

उनकाे अल्का अस्पतालमा उपचार भइरहेको छ। उनको शरीरमा चोट लागेको छ। टाउको, हातखुट्टा, ढाड र छातिमा गहिरो चोट छ। 

‘जीउमा साधारण चोटपटक छ,’ उनले भने, ‘टाउको भने अत्याधिक दुखेको महशुस भएको छ।’

उनको टाउकोको सिटिस्क्यान समेत गरिएको महानगरीय ट्राफिक प्रहरी प्रमुख एसएसपी भीम ढकालले जानकारी दिए। 

‘टाउको अत्याधिक दुख्यो भनेपछि हामीले सिटिस्क्यान गरायौं,’ उनले भने, ‘आतिनुपर्ने स्थिति छैन, रिपोर्ट सामान्य देखिएको छ।’

घिमिरेलाई अहिले अब्जरबेसनमा राखिएको छ। ‘ केही समस्या होला भनेर  चिकित्सकले आज अस्पतालमै बस्न सुझाव दिएका छन्। शुक्रबार उनी डिस्चार्ज हुनेछन्,’ एसएसपी ढकालले भने।