बाँकेमा सालो नाता पर्ने बालकलाई अपहरण गर्ने एक युवक पक्राउ परेका छन्। 

खजुरा गाँउपालिकाका १३ वर्षीय बालकलाई अपहरण गर्ने नेपालगञ्ज उपमहानगरपालिका १६ बस्ने २७ वर्षका कल्लु भनिने कलिम खाँ पक्राउ परेका हुन्। 

ती बालक भदौ ९ गते अपहरणमा परेका थिए। अपहरणको तीन दिनपछि ती बालकसहित अभियुक्त खाँलाई नियन्त्रणमा लिइएको जिल्ला प्रहरी कार्यालय बाँकेले जनाएको छ। 

प्रमुख प्रहरी उपरीक्षक एसपी ओमबहादुर रानाका अनुसार ११ गते जानकी गाँउपालिका ५ स्थित पीडितको फुपुको घरमा छोडेको अवस्थामा फेला पारेर उद्दार गरिएको गरिएको हो। खाँले बालक अपहरण गरी फिरौती माग्दै आएका थिए। 

‘अभियुक्त खाँले बालकको परिवारसँग फरौती स्वरुप १० लाख रुपौयाँ माग गरेका थिए,’ उनले भने, ‘सूचना प्राप्त भएसँगै अनुसन्धानमा जुटेको प्रहरीले तिन दिनको प्रयासपछि बालकलाई अपहरणमुक्त बनाउन सफल भयौं।’