प्रहरीले मकवानपुरबाट ठूलो परिमाणमा अवैध लागूऔषध गाँजा बरामद गरेको छ।

जिल्ला प्रहरी कार्यालय मकवानपुरबाट खटिएको प्रहरी टोलीले सोमबार बिहान थानाभर्‍याङस्थित पूर्व-पश्चिम सडक खण्डमा रोकी चेकजाँच गर्दा कारबाट ८५ किलो अवैध लागूऔषध गाँजा बरामद गरेको हो।

जिल्ला प्रहरी कार्यालय मकवानपुरका अनुसार मनहरीबाट हेटौंडातर्फ आउँदै गरेको बा १२ च ८५५६ नं. को कारमा उक्त गाँजा फेला परेको हो। प्रहरीले गाँजासँगै चितवन इच्छाकामना गाउँपालिका ७ का गणेश थापालाई नियन्त्रणमा लिएको जनाएको छ।

गाँजासहित पक्राउ परेका थापालाई प्रहरी हिरासतमा राखि आवश्यक अनुसन्धान अघि बढाएको जिल्ला प्रहरी कार्यालय मकवानपुरले जनाएको छ।