काठमाडौँको बुढानिलकण्ठ नगरपालिका–४ पासिकोटस्थित बा२क ९९७४ नम्बरको स्कुलबसको ठक्करबाट आज एक बालिकाको मृत्यु भएको छ ।

उक्त दुर्घटनामा परी पासिकोट बस्ने पाँचथर घर भएका दिनेश नेपालीका तीन वर्षीया छोरी सुजितीको मृत्यु भएको प्रहरी प्रधान कार्यालयले जनाएको छ । ठक्करबाट गम्भीर घाइते भएकी बालिकाको उपचारका लागि न्यूरो अस्पताल बाँसबारीतर्फ लैजाने क्रममा बाटो मै मृत्यु भएको हो । 

 लागुऔषधसहित पक्राउ 

चन्द्रागिरी नगरपालिका–२ नागढुङ्गाबाह अवैध लागुऔषध ब्राउनसुगरसहित तीन जनालाई आज प्रहरीले पक्राउ गरेको छ । पक्राउ पर्नेमा झापा बाहुनडाँगी बस्ने २० वर्षीय यमन रानामगर, बिर्तामोड नगरपालिका–१ बस्ने २२ वर्षीय विशाल लिम्बु र २१ वर्षीय सुनिल देवान रहेका छन् ।

महानगरीय प्रहरी प्रभाग नागढुङ्गाबाट खटिएको प्रहरी टोलीले झापाबाट काठमाडौँतर्फ आउँदै गरेको ना६ख ४१० नम्बरको बसलाई जाँचका क्रममा लागुऔषध फेला परेपछि उनीहरुलाई पक्राउ गरिएको हो ।