सुनकोसीमा पौडी खेल्ने क्रममा एक युवक आज बेपत्ता भएका छन्। सुनकोशी गाउँपालिका–२ दुम्जा नजिक सुनकोशीमा साथीसँगै पौडी खेल्ने क्रममा काठमाडौंको कीर्तिपुरका २५ वर्षीय अमृत लामा बेपत्ता भएको प्रहरी उपरीक्षक चक्रबहादुर सिंहले जानकारी दिए।

काठमाडौंबाट सिन्धुलीको कुशेश्वर महादेव मन्दिरको दर्शन गर्न पाँच जना साथीसँगै आएका लामा बेपत्ता भएका हुन्। उनको खोजी गर्न प्रहरी परिचालन गरिएको छ। लामासँगै पौडी खेल्न गएका अन्य भने पौडी खेलेर नदीबाट निस्किन सफल भएका थिए। घटनाबारे अनुसन्धान भइरहेको जिल्ला प्रहरी कार्यालयले जनाएको छ।