सुर्खेतमा टिप्परको ठक्करबाट पत्रकार नन्द बहादुर गेलाङ्गको मृत्यु भएको छ।

जिल्लाको भेरीगंगा नगरपालिका–८ लोदेमा बुधबार दिउँसो टिप्परले मोटरसाईकललाई ठक्कर दिँदा मोटरसाइकलमा सवार सुर्खेतका पत्रकार गेलाङ्गको निधन भएको हो।

सुर्खेतबाट प्रकाशन हुने ‘पहिचान दैनिक’ का सम्पादक तथा नेपाल पत्रकार महासंघ सुर्खेत शाखाका सह–सचिवसमेत रहेका गेलाङ्गे छिन्चुबाट मेहलकुना जाँदै थिए। गेलाङ्ग सवार भे ८ प ७६०४ नम्बरको मोटरसाइकललाई रूकुम पश्चिमबाट आइरहेको बा ५ ख १६८३ नम्बरको टिप्परले ठक्कर दिएको इलाका प्रहरी कार्यालय छिन्चुका प्रहरी निरीक्षक निरोज चौलागाईंले जानकारी दिए ।

ठक्कर दिएलगत्तै टिप्पर चालकले ब्याक गरेर उनलाई मारेको हुनसक्ने चौलागाईको भनाई छ। चालक फरार छन्।