राष्ट्रिय स्वतन्त्र पार्टीका सभापति रवि लामिछानेले संस्कृति, पर्यटन तथा नागरिक उड्डयनमन्त्री सुदन किरातीको अभिव्यक्ति पदीय गरिमाविपरीत भएकाे बताएका छन्।

‘क्रिश्चियन नमान्ने संविधान विरोधी हुन्, संविधान नमान्ने देशद्रोही हुन्, उनीहरूलाई हतकडी लगाए जेल हाल्नुपर्छ’ भन्ने मन्त्री किरातीको अभिव्यक्तिलाई लिएर चौतर्फी विरोध भइरहेको बेला रास्वपा सभापति लामिछानेले यस्ताे बताएका हुन्।

उनले मन्त्री किरातीको अभिव्यक्तिप्रति खेद प्रकट गर्दै साम्प्रदायिक विद्वेष फैलाउने व्यक्ति संस्कृति मन्त्री जस्तो जिम्मेवार पदमा बस्न नमिल्ने बताए।

‘संस्कृति मन्त्री सुदन किराँतीको पछिल्लो अभिव्यक्ति सामाजिक सद्भाव र सहिष्णुता खलबलाउने प्रकृतिको, उत्तेजक, गैरजिम्मेवार, पदीय गरिमा विपरीतको र अत्यन्तै खेदजनक छ’, उनले सामाजिक सञ्जालमा लेखेका छन्, ‘यस्तो गैर-जिम्मेवार अभिव्यक्ति दिने र साम्प्रदायिक विद्वेष फैलाउने व्यक्ति संस्कृति मन्त्री जस्तो जिम्मेवार पदमा कसरी बस्न मिल्छ? प्रधानमन्त्रीज्यु, गम्भीर ध्यानाकर्षण होस्।’